काठमाडौँ। प्रधानमन्त्री वालेन्द्र शाहले शिक्षा र स्वास्थ्य क्षेत्रमा लगाएको समता कर लागू नगर्ने निर्णय गरिएको जनाएका छन्।
मंगलबार प्रधानमन्त्री शाहले सामाजिक सञ्जालमार्फत कर लागू नगर्ने निर्णय भएको जनाएका छन्। ‘निजी शिक्षा र स्वास्थ्य क्षेत्रमा लगाइएको ३ प्रतशित समता कर अहिले भने बमोजिम नै कार्यान्वयन गर्दा आममानिसले थप खर्च र निराशा भोग्नु पर्ने देखियो। यसैले माननीय अर्थमन्त्री स्वर्णिम वाग्लेसँगको परामर्शपछि हालका लागि शिक्षा समता शुल्क र स्वास्थ्य समता शुल्क लागू नगर्ने निर्णय गरिएको छ,’ शाहले भनेका छन्।
करको दायरा विस्तार गर्ने लक्ष्य भए पनि यसले नागरिकलाई असर परेकाले लागू नगर्ने निर्णय गरिएको उनको भनाइ छ। ‘३ प्रतिशत समता कर ल्याउनुको उद्देश्य दुर्गम र पछाडि परेका क्षेत्रका नागरिकलाई राम्रो शिक्षा र स्वास्थ्य सेवा उपलब्ध गराउनु, दलित, सिमान्तकृत तथा विपन्न बालबालिकालाई सहयोग गर्नु, स्वास्थ्य बीमा विस्तार गर्नु र त्यसका लागि आवश्यक आर्थिक स्रोत जुटाउनु थियो। साथै, करको दायरा विस्तार गरेर अर्थतन्त्रलाई अझ व्यवस्थित बनाउने लक्ष्य पनि थियो,’ उनले भनेका छन्।
नागरिक तमा समता करप्रति देखिएको प्रतिक्रियाले गम्भीर ध्यानाकर्षण भएको उनले उल्लेख गरेका छन्। कुनै पनि निर्णयमा नागरिक असन्तुष्ट भएमा सुधार्न सरकार तयार रहेको उनले जनाएका छन्।
‘नागरिक तहमा समता देखिएको समता करप्रतिको प्रतिक्रियाले सरकारको गम्भीर ध्यानाकर्षण गरेको छ। नागरिकको माग सुन्दै अगाडि बढ्न तथा समतामूलक समाज निर्माण गर्न हाम्रो प्रतिबद्धता अटल र स्पष्ट छ,’ प्रधानमन्त्री शाहले भनेका छन्, ‘सरकारका सबै निर्णय नागरिकको हितलाई केन्द्रमा राखेर गरिएका छन् र गरिनेछन्। कुनै निर्णयप्रति नागरिक असन्तुष्ट भएमा त्यसलाई सुधार्न र परिमार्जन गर्न सरकार सधैं तयार रहनेछ।’
उनले निजी अस्पतालका १० प्रतशित शय्या, निजी क्याम्पस र विश्वविद्यालयको १० प्रतिशत सिट न्यायोचित वितरणमा सरकार प्रतिबद्ध रहेको जनाएका छन्।
प्रधानमन्त्री शाहले भनेका छन्, ‘विपन्न र गरिब नागरिकले गुणस्तरीय शिक्षा र स्वास्थ्य सेवा पाउन सकून् भन्ने उद्देश्यले निजी अस्पतालमा १० प्रतिशत बेड र निजी क्याम्पस तथा विश्वविद्यालयमा १० प्रतिशत सिट पारदर्शी र न्यायोचित रूपमा उपलब्ध गराउने नीति कार्यान्वयन गर्न सरकार प्रतिबद्ध छ।’
